Vefsíða Borgarbókasafns

Söguhringur kvenna er samstarfsverkefni Borgarbóksafnsins og Samtaka kvenna af erlendum uppruna og er hann ætlaður erlendum konum. Síðastliðinn sunnudag, 9. nóvember, var fyrsti söguhringurinn og er óhætt að segja að hann hafi tekist vel. Konur frá m.a. Albaníu, Póllandi, Þýskalandi, Bandaríkjunum, Rússlandi, Venezuela og El Salvador hittust, spjölluðu saman og deildu sögum sínum hver með annarri. Ekki vantaði áhugann og eftir samveruna voru konurnar fróðari um það hvernig er að koma til Íslands sem útlendingur, kynnast samfélaginu og læra tungumálið. Vera Sörensen, listakona frá Úkraínu, var gestur söguhringsins og kynnti myndlist sína.

Söguhringurinn verður fyrsta sunnudag í mánuði og er áformað að gera ýmislegt í tengslum við hann, svo sem að fara í leikhús og á listsýningar. Konur af erlendum uppruna eru hvattar til að mæta, deila sögu sinni, kynnast sögum annarra kvenna og njóta samveru og menningar með þeim.

Næsti söguhringur verður 7. desember kl. 15.00 á 6. hæð í Grófarhúsi, Tryggvagötu 15 og þá verður m.a talað um jólasiði. Sérstakur gestur verður Kjuregei Alexandra Argunova, listakona.