Á síðustu 10 dögum hefur fólk af erlendum uppruna sem stundar íslenskunám streymt í aðalsafn Borgarbókasafns. Þetta eru annars vegar starfsmenn Reykjavíkurborgar sem eru í íslenskunámi hjá Alþjóðahúsi og hins vegar starfsfólk Landspítalans sem Mímir kennir. Hingað hafa komið 11 hópar í kynningu og ratleik um safnið, þar sem starfsemin er kynnt á lifandi hátt. Gestirnir fá ókeypis bókasafnskort og með því aðgang að þúsundum bóka, myndefni, tónlist, tímaritum o.fl. Sumir í þessum hópum höfðu aldrei stigið fæti inn á bókasafn áður og virtust gestirnir vera yfir sín hrifnir af öllum möguleikunum sem safnið hefur upp á að bjóða. Í einum hópnum var fólk sem er ólæst á vestrænt letur og hafði þess vegna því meira gaman af að fylla pokana með dvd-myndum og tónlist.
Síðustu helgina í apríl kom svo hópur af spænskumælandi börnum í kynningu, leiki og sögustund en heimsóknin var hluti af móðurmálkennslu barnanna. Það var t.d. farið í bókasafnsleik þar sem börnin áttu að para saman íslensk og spænsk orð sem tengjast bókasafninu og síðan var upplestur og kynning á barnastarfseminni, sem fór fram á spænsku.
Bókasafnið er einstök gátt að samfélaginu og við hvetjum alla til að kynna sér fjölmenningarleg verkefni Borgarbókasafnisins:
Myndbanda- og DVD deildin skoðuð
Það eru líka til tungumálanámskeið á safninu
Hvernig er bókasafn skrifað á þínu tungumáli?
Spænskumælandi börn í safnkynningu
