Fréttayfirlit

Fjölskyldumorgnar á bókasafninu – fræðsla um málþroska barna 26. og 28. janúar

Í Borgarbókasafni Reykjavíkur er nú boðið upp á vikulega fjölskyldumorgna í aðalsafni og Gerðurbergssafni þar sem fjölskyldum með ung börn er boðið að koma í safnið og eiga þar notalega samverustund. Á safninu eru leikföng og alls kyns bækur fyrir börnin og þeir fullorðnu geta nálgast allt það spennandi efni sem safnið hefur upp á að bjóða, bækur, tónlist, kvikmyndir, blöð og tímarit, auk þess að hitta aðra foreldra til að spjalla, njóta samverunnar og þiggja hressingu. Í aðalsafni er auk þess lesið fyrir eldri börnin og sungið með þeim yngri. Allir sem eru með ung börn eru velkomnir, hvort sem fólk býr í viðkomandi hverfi eða annars staðar. Fjölskyldumorgnarnir eru í Gerðubergssafni á þriðjudögum frá kl. 10:30 – 11:30 og í aðalsafni í Tryggvagötu á fimmtudögum frá kl. 10:30 – 11:30.

Eitt af markmiðum fjölskyldumorgnanna er að veita fjölskyldum ungra barna óformlega fræðslu um ýmis málefni sem varða börn og uppeldi. Nú í janúar mun Ingibjörg Margrét Gunnlaugsdóttir leikskólaráðgjafi vera í Gerðubergi 26. janúar og í aðalsafni þann 28. og spjalla um málþroska barna frá fæðingu til 5-6 ára aldurs. Hún mun ræða um hvernig eðlilegur málþroski barns gengur fyrir sig og á hvern hátt má styðja við hann.

Fjölskyldumorgnarnir eru hluti af barna- og fjölmenningarstarfi Borgarbókasafns og samstarfsverkefni safnsins, Menningarmiðstöðvarinnar Gerðubergs og Leikskólasviðs Reykjavíkurborgar. Hægt er að fylgjast með dagskránni á heimasíðu Borgarbókasafns og einnig á Facebooksíðunni Fjölskyldumorgnar á bókasafninu.

Hér má einnig nálgast bækling um fjölskyldumorgnana á níu tungumálum.