Kristín R. Vilhjálmsdóttir, verkefnastjóri fjölmenningar á Borgarbókasafni, er tilnefnd til samfélagsverðlauna Fréttablaðsins í flokkinum „Til atlögu gegn fordómum". Tilnefninguna hlýtur hún fyrir starf sitt og verkefni tengd fjölmenningu.
Kristín var ráðin á Borgarbókasafn fyrir 2 árum sem verkefnastjóri fjölmenningar. Markmið starfsins er meðal annars að stuðla að gagnkvæmri félagslegri aðlögun, skilningi og virðingu sem nauðsynleg er í fjölmenningarlegu samfélagi, rjúfa einangrun og auka færni í íslensku. Kristín hefur unnið frumkvöðlastarf í safninu af smitandi elju og meðal annars efnt til samvinnu við ýmis félagasamtök og stofnanir.
Skýrsla um fjölmenningarlegt starf á Borgarbókasafni 2008-2010
Kristín ásamt Vigdísi Finnbogadóttur, Helgu Arnalds og Fitore Berisha, við afhjúpun listaverksins Tölum saman á eins árs afmæli Söguhrings kvenna, 1. nóvember síðastliðinn. Verkið var unnið af konum í Söguhringnum undir leiðsögn Helgu og Fitore.
