Fimmtudaginn 10. júní, kl. 20.00, er önnur kvöldganga sumarsins. Gengið verður um gömlu höfnina í Reykjavík.
Höfnin og hafið eru í aðalhlutverki í hafnargöngu Borgarbókasafns Reykjavíkur, sem nefnist Mararþaraborg. Þar verður gengið meðfram Reykjavíkurhöfn, frá Miðbakka í átt að Granda.
Höfnin og hafið koma víða við í íslenskum bókmenntum bæði í ljóðum og lausu máli og gefst gestum færi á að smakka á hinum ýmsu afurðum sjávarins í meðförum rithöfunda frá ýmsum tímum og úr ólíkum áttum. Við sögu koma meðal annars draugur við Duusbryggju, þulur um hafið og frásögn af óvæntum ráðningum á togara. Gangan er í samstarfi við Víkina-Sjóminjasafn og er lagt upp frá Grófarhúsi, Tryggvagötu 15, kl. 20.00. Gert er ráð fyrir að hún taki rúmlega klukkutíma. Leiðsögumenn eru Úlfhildur Sæborg Dagsdóttir og Ingibörg Hafliðadóttir.Aðgangur er ókeypis og allir velkomnir.
Kynntu þér dagskrá kvöldganganna!
