Getraunin tengist að þessu sinni tónlist, vestrum og sviplegum dauðsföllum. Um er að ræða fjóra bandaríska tónlistarmenn á sviði dægurtónlistar sem allir fengust við lagasmíðar, söng og gítarleik þó mismiklum mæli væri.
Eiginlegur tónlistarferill þess elsta í hópnum stóð einungis yfir í tæpa 18 mánaða í lok sjötta áratugar síðustu aldar. Engu að síður tókst honum að hafa ómæld áhrif á síðari tíma þróun rokk- og popptónlistar. Titill vinsælasta smells hans er bein tilvísun í frægt tilsvar John Waynes í frægum leitarvestra John Fords frá árinu 1956.
Þremur árum síðar í fyrstu og frægustu gerð þriggja keimlíkra umsátursvestra leikstjórans Howard Hawks lék svo önnur og ögn poppaðri unglingastjarna ungan og brattann byssumann á móti framangreindum Jóni væna. Nokkru síðar gerði hann svo víðfrægt lag kollega síns um stúlku sem bar að hluta til sama nafn og tiltekin guðsmóðir og rúmum áratug seinna átti hann sinn síðasta smell sem hét það sama og vinsælasti jazzfönksrmellur Íslandssögunnar. Þriðji tónlistarmaðurinn sem hér er spurt um var fyrst og fremst frábær blúsrokkgítaristi sem átti stóran þátt í endurlífgun blúsins á áttunda áratugnum. Hann tengist vart vestrum á annan hátt en þann að hafa haft Texasblóð fljótandi í æðum og flestum stundum borið kúrekahatt á höfði. Sem einum af bestu gítaristum sögunnar er honum gjarnan líkt við Buddy Guy og Jimmy Hendrix og líkt og Hendrix kom hann sér gjarnan í meir en tvöföld vandræði með óhóflegri neyslu áfengis og eiturlyfja þótt hann að vísu hafi verið að mestu verið kominn á réttan kjöl fyrir ótímabæran dauða sinn við lok ofangreinds áratugar.
Sá fjórði og síðasti af þeim félögum fékkst aðeins við kvikmyndaleik en var einkum þekktur á áttunda áratugnum fyrir sína björtu háfjallarödd og sveitapoppsmelli sem dásömuðu gjarnan heilbrigði sveitalífsins og leit borgarbúans að veginum heim í sveitina góðu. Í lok sjöunda áratugarins hafði hann þó samið lag sem varð að ofursmelli í flutningi frægs þjóðlagatríós hvers söngkona bar einnig nafn tiltekinnar guðsmóður. Titill þess lags tengist svo á óbeinan og kannski kaldhæðnislegan hátt dauðdaga allra framangreindra listamanna sem allir létust í flugsslysum.
Spurt er: 1. Nefnið að minnsta kosti þrjá af tónlistarmönnunum sem fjallað er um hér að framan. 2. Nefnið að minnsta kosti einn af þeim vestrum sem vísað er til 3. Nefnið að minnsta kosti einn af þeim smellum sem rætt er um
Sendið svar á gudridur.sigurbjornsdottir@reykjavik.is . Dregið verður úr réttum lausnum í lok mánaðarins. Verðlaunin eru ekki af verri endanum eða gjafakort fyrir ársskírteini á Borgarbókasafni sem veitir aðgang að þúsundum bóka, tímarita, tónlistardiska, DVD-diska og guð má vita hvað.
