Bókaverðlaun barnanna voru afhent í níunda sinn í aðalsafni Borgarbókasafns Reykjavíkur sunnudaginn 15. maí. Safnið verðlaunar árlega tvær bækur sem börn á aldrinum 6 – 12 ára hafa valið, aðra frumsamda og hina þýdda, og hlutu bækurnar Ertu guð afi? eftir Þorgrím Þráinsson og Dagbók Kidda klaufa eftir Jeff Kinney í þýðingu Helga Jónssonar flest atkvæði að þessu sinni. Forlagið gaf út bók Þorgríms og Tindur þýðingu Helga.Valið fór fram í grunnskólum og bókasöfnum um allt land og tóku rúmlega fjögur þúsund börn þátt í kosningunni. Til þess að auðvelda börnunum valið fengu skólarnir og söfnin send vegleg veggspjöld með myndum af kápum bóka sem komu út árið 2010.Töframaðurinn Jón Víðis afhenti Þorgrími og Helga verðlaunin á fjöldskyldudagskrá í Grófarhúsi þar sem skólakór Grandaskóla söng og síðan var boðið upp á flugdrekasmiðju í umsjón Björns Finnssonar og Jóns Víðis. Nokkur börn sem sendu inn atkvæði fengu viðurkenningar fyrir þátttökuna í formi leikhúsmiða og bóka og eitt þeirra, Laufey Lín Bing Jónsdóttir, fær að auki Þorgrím Þráinsson í heimsókn í bekkinn sinn. Leikverkin sem börnin fá að sjá eru Ballið á Bessastöðum í Þjóðleikhúsinu og Eldfærin í Borgarleikhúsinu og fylgir sérstök heimsókn baksviðs með. Auk Laufeyjar fengu eftirtalin börn viðurkenningu: Lára Sif Þórisdóttir, Patrik Írisarson Santos, Léo Ernir Reynisson, Joshua Francis Kingdon, Kamila Buraczewsk, Jökull Þorkelsson og Skarphéðinn Traustson.
