Nú er Sóla sögukona farin aftur í frí, en hún hefur farið á leikskólana í desember og sagt börnunum sögur af sjálfri sér og bræðrum sínum, jólasveinunum (það var auðvitað hún sem stakk af til útlanda um árið og sendi þeim fréttir af jólasveinum í rauðum fötum og sagði þeim að hætta að hrekkja og gefa frekar gjafir!). Nú ætlar hún að aðstoða Gáttaþef, Kjötkrók og Kertasníki við að setja í skóinn. Hún keyrir þá á sögubílnum Æringja um alla borg og getur því ekki farið á fleiri leikskóla.
Björk bókavera hefur að mestu verið með sögustundirnar í sögubílnum þetta árið. Hún hefur beðið börnin um að semja ljóð og hægt er að lesa sum þeirra á barnasíðu Borgarbókasafnsins semog sögurnar sem samdar voru í bílnum á siðasta ári. Sumir leikskólar tóku þátt í „OrðUm Reykjavík“ undir stjórn Bjarkar og má sjá afraksturinn á www.urb.is
Á ár opnaði sýning í aðalsafni á sögum barnanna sem komu í sögubílinn á síðasta ári, en unglingar í nokkrum grunnskólum teiknuðu myndir við sögurnar. Sýningin fór svo í Foldasafn og verður sett upp í Ársafni í byrjun næsta árs.
Sögubíllinn Æringi er gífurlega vinsæll og á næsta ári verður hann búinn að þjóna leikskólum og frístundaheimulum borgarinnar í 4 ár!
Sóla, Björk og Æringi óska öllum gleðilegra jóla og farsæls komandi árs og hlakka til að hitta ykkur á nýju ári.
JólaSóla
