EM er sýnt í háskerpu í Kamesi Borgarbókasafns, Tryggvagötu 15, á opnunartíma safnsins. Í dag hefst útsending kl. 15.30 með EM-stofunni og svo tekur leikur Svíþjóðar og Englands við kl. 16.
Heitt te á könnunni (fótboltamenn fá sér víst alltaf te í hálfleik), útstilling á tónlist þátttökuþjóðanna semog bókum um þær og fótbolta. Allir velkomnir.
Kamesið er á 5. hæð í aðalsafni og er það lítið fjölnotarými fyrir viðburði af ýmsu tagi, s.s. sýningar á kvikmyndum og vídeóverkum, upplestur, söguflutning, kynningar, fundi, uppistand, leiksýningar, tónleika og fleiri uppákomur sem ekki þarfnast stórs rýmis. Vegna smæðar rýmisins eru meiri möguleikar á nánd við áhorfendur/áheyrendur.
Ef þú átt í fórum þínum frumsamið efni, býrð yfir hæfileikum sem þú vilt koma á framfæri eða veist af einhverju sem gæti hentað fyrir Kamesið, sendu póst á: sigurdur.vigfusson@reykjavik.is.
