Vefsíða Borgarbókasafns

Áhugavert á safninu

Ævintýri og norsk gotneska

The Good Prince
Í tíunda bindi ævintýraseríunnar Fables er húsvörðurinn aðalhetjan. Hann hefur reyndar ekki verið húsvörður alla sína tíð, því einu sinni var hann prins, enda heitir bókin The Good Prince. Ambrose prins tók að sér starf húsvarðar í húsi borgarstjóra Ævintýra-bæjar, en það eru fáir sem þekkja hann undir réttu nafni, almennt er hann bara kallaður ‘Fluga’ eða í mesta lagi ‘Fluguveiðari’, en það nafn vísar til þess að hann var eitt sinn froskur, sem prinsessa kyssti og breytti þannig í prins. Ambrose þjáist af minnisleysi, en þegar her Óvinarins réðist inn í land hans þá horfði prinsinn varnarlaus uppá hvernig eiginkona hans og dætur voru myrtar. En nú hefur hann fengið minnið aftur og ræðst með óvígan her drauga inní ævintýraheiminn og storkar Óvininum. Helsta vopn Ambrose er það að hann er góður í gegn, heill í öllu sem hann gerir og þannig tekst honum að sigrast á öllum hindrunum. En góðsemi hans og sakleysi kemur hinsvegar í veg fyrir að hann sjái það sem er öllum öðrum augljóst: að Rauðhetta er bráðskotin í honum. En kannski ná þau saman að lokum, sögunni er ekki lokið.

Fables serían
Fables serían er skrifuð af Bill Willingham og (aðallega) teiknuð af Mark Buckingham. Sagan hóf göngu sína árið 2002 og hefur notið gífurlegra vinsælda æ síðan, enda einstaklega heillandi bókmenntaverk. Hér eru ævintýri færð í búning fyrir fullorðna (bækurnar eru ekki ætlaðar börnum) en sagan gerist á okkar tímum og segir frá baráttu ævintýravera við Óvininn sem hefur hertekið ævintýraheimana og neytt fjölda ævintýrapersóna í útlegð inn í mannheima. Þau stofna síðan sitt eigið samfélag þar, Ævintýrabæ, sem er staðsettur í New York borg. Auk Ambrose koma fjöldi misþekktra ævintýrapersóna við sögu eins og til dæmis Mjallhvít, Móglí, Úlfurinn, Rauðhetta, (sælgætishúss) nornin og Hans, Gosi, Þumalína, Snædrottningin, Jói (og baunagrasið), Bláskeggur, Þyrnirós, Öskubuska og blindu mýsnar þrjár. Hér eru því felldir saman í eitt ævintýraheimar Grimmsbræðra og þekktar sögur fyrir börn – og jafnvel fullorðna. Og svo má heldur ekki gleyma austurlenskum ævintýrum, aðallega úr Þúsund og einni nótt (svona ef einhver héldi að sagan sé dæmisaga um árásir múslínga á vesturlönd).

Þess má geta að hér á borgarbókasafninu vinnur fríður flokkur húsvarða sem gætu fullt eins verið prinsar í dulargerfi, eða þá froskar.

Hellboy og B.P.R.D.
Hafmaðurinn Abe Sapien minnir dálítið á frosk í bókunum um Hellboy og B.P.R.D. eða Stofnun fyrir yfirnáttúrulegar rannsóknir og varnir, en í sjöundu bók síðarnefndu seríunnar er hann aðalmaðurinn (eða fiskurinn). Abe Sapien er fiskmaður og líkt og Ambrose prins hefur hann misst minnið og þekkir ekki uppruna sinn. En í Garden of Souls fær hann að vita allt um það hvernig hann varð til. Mike Mignola er höfundur Hellboy og sögurnar um yfirnáttúrulegu stofnunina eru hliðarspuni við þá sögu, en þar er sagt frá félögum Hellboy eftir að hann hættir hjá stofnuninni. Mignola skrifar þessar sögur líka (stundum í samstarfi við aðra höfunda) og teiknarinn Guy Davis stendur sig vel í að búa til sína eigin útgáfu af dásamlega gotneskum hrollvekjuheimi Mignola. Sagan gerist að hluta til í London á viktoríutímabilinu og segir frá tilraunum nokkurra aðalsmanna, meðal annars bandaríkjamanns sem síðar varð að Abe Sapien. Ein persónan er þrjúþúsundára gömul en sprelllifandi egypsk múmía, Panya að nafni, sem aðalsmennirnir halda fanginni, en hún kemur einnig við sögu í næstu bók, Killing Ground.

Er bókin inni? Athugaðu í Gegni!

Það erfiðasta við þessar tvær myndasöguseríur er að leggja þær frá sér. Bæði eru sögurnar vel skrifaðar og áhugaverðar og svo er myndheimurinn svo heillandi að það er næstum óbærileg freisting að byrja strax aftur frá byrjun um leið og bókin er búin. Davis og Buckingham fylla síðurnar af forvitnilegum smáatriðum sem gera bækurnar algerlega ómótstæðilegar. (Muna samt að skila á réttum tíma.)

Bourbon Island
Sjóræningjar eru hinsvegar viðfangsefni frönsku höfundanna Appollo og Lewis Trondheim í Bourbon Island 1730, en sú saga er að hluta til byggð á sögulegum heimildum um eyju þarsem sjóræningum var veitt sakauppgjöf og hæli. Lesandi fylgir fuglafræðingi og aðstoðarmanni hans sem eru að koma til eyjunnar í leit að Dúdú fuglinum en þegar þeir lenda tilkynnir aðstoðarmaðurinn að hann ætli alls ekki að standa í fuglafræðum heldur gerast sjóræningi. En af einhverjum ástæðum taka sjóræningjarnir honum ekki vel þegar hann býður sig fram svo hann situr uppi með fuglana. Inní söguna blandast svo átök milli þræla og þrælahaldara og dulítil ástarsaga aðstoðarmannsins og dóttur sjóræningjaskipstjóra nokkurs sem er hættur sjóránum og stundar nú búskap – og þrælahald. Teikningar Trondheim eru að vanda kómískar dálítið léttúðugar og allar persónur eru í dýralíki. Eyjan er öll vaxin frumskógi og á stundum virka myndirnar eins og felumyndir, enda er aldrei að vita hvað leynist í skóginum.
Bourbon Island
Sjóræningjar eru hinsvegar viðfangsefni frönsku höfundanna Appollo og Lewis Trondheim í Bourbon Island 1730, en sú saga er að hluta til byggð á sögulegum heimildum um eyju þarsem sjóræningum var veitt sakauppgjöf og hæli. Lesandi fylgir fuglafræðingi og aðstoðarmanni hans sem eru að koma til eyjunnar í leit að Dúdú fuglinum en þegar þeir lenda tilkynnir aðstoðarmaðurinn að hann ætli alls ekki að standa í fuglafræðum heldur gerast sjóræningi. En af einhverjum ástæðum taka sjóræningjarnir honum ekki vel þegar hann býður sig fram svo hann situr uppi með fuglana. Inní söguna blandast svo átök milli þræla og þrælahaldara og dulítil ástarsaga aðstoðarmannsins og dóttur sjóræningjaskipstjóra nokkurs sem er hættur sjóránum og stundar nú búskap – og þrælahald. Teikningar Trondheim eru að vanda kómískar dálítið léttúðugar og allar persónur eru í dýralíki. Eyjan er öll vaxin frumskógi og á stundum virka myndirnar eins og felumyndir, enda er aldrei að vita hvað leynist í skóginum.

Er bókin inni? Athugaðu í Gegni!

Nemi Nemi
Að lokum langar mig að gleðjast yfir því að nú hefur hin norska Nemi verið þýdd á ensku (einhverntíma hefði þetta verið kallað útrás, en nú hefur það orð svo neikvæða merkingu að það verður ekki notað hér). Höfundurinn Lisa Myhre kom hingað á barnabókaráðstefnu í Norræna húsinu fyrir nokkrum árum og vakti ekki líktþví nógu mikla athygli, en myndasögur hennar um hina gotnesku Nemi eru alveg dásamlegar, bæði fyndnar og snjallar. Nemi er svarthærð og hvít, eins og hæfir hennar lífs- og fatastíl, og alltaf teiknuð í svarthvítu, öfugt við vini hennar sem eru afar litglaðir, jafnvel með blátt hár. Nemi birtist upphaflega sem dagblaðasería og fylgir því formi, ýmist eru hér svokallaðar strípur eða heilsíðu-sögur. Heilmikið er gert úr strákavandræðum Nemi, auk þess sem fjallað er um hennar lífsviðhorf (þolir ekki dansandi stráka- og stelpubönd, en dáir Ozzy sem bítur hausinn af leðurblöku uppi á sviði) og inngrip hennar í barnauppeldi, en þar tilkynnir hún meðal annars einum unga að honum sé hollast að borða eins mikið sælgæti og hann geti meðan hann hafi barnatennur – þær eiga eftir að detta út – og að jólasveinninn sé ekki til. Þegar móðirin gerir athugasemd við þetta segir Nemi döpur: “Ég vildi að einhver hefði sagt mér þetta.” Og því segi ég ykkur, sannlega: komið á bókasafnið og fáið ykkur myndasögur fyrir jólin! Þær slá öllum jólasveinum við og koma næstum því í stað sælgætisáts.