Fimmta ljóðaslamm Borgarbókasafns Reykjavíkur verður haldið á Safnanótt, föstudaginn 10. febrúar 2012. Að þessu sinni er þemað myrkur, en þema Safnanætur er „magnað myrkur“.
Sem fyrr er ljóðaslammið ætlað ungu fólki (frá aldrinum 15-25 ára) og er skilgreint á afar opinn hátt sem einskonar ljóðagjörningur og er áherslan ekki síður lögð á flutninginn en á ljóðið sjálft. Þannig telst hefðbundinn ljóðaupplestur ekki til ljóðaslamms.
Dagskrár síðustu fjögurra ára hafa einkennst af hugmyndauðgi, krafti og frumleika en fyrri þemu voru ‚spenna’, ‚hrollur’, ‚væmni‘ og ‚sjálfstæði‘. Eina krafan hefur verið sú að flutt væri frumsamið ljóð eða stuttur prósi og hafa þátttakendur sýnt dansverk, ör-leikþætti, rapp, fólk hefur sungið og leiklesið ljóð með myndefni svo eitthvað sé nefnt.
Fimm manna dómnefnd velur þrjú bestu atriðin. Í henni sitja fyrir hönd Borgarbókasafns María Þórðardóttir leikkona og Úlfhildur Dagsdóttir bókmenntafræðingur. Aðrir eru Stefán Máni rithöfundur, Guðlaug Elísabet Ólafsdóttir leikkona og Óttarr Proppé tónlistarmaður.
Upptökur af siguratriðunum þremur verða settar á ljodaslamm.is, sem er undirsíða borgarbokasafn.is og á YouTube.
Ljóðslammið er í samvinnu við Samband íslenskra framhaldsskólanema og Bókmenntaborgina
Sem fyrr segir er ljóðaslammið haldið á Safnanótt, 10. febrúar 2012, og fer dagskráin fram á aðalsafni Borgarbókasafns að Tryggvagötu 15 og hefst kl. 20:30.
Skráningarfrestur er til föstudagsins 27. janúar 2012.
Sjá nánar um ljóðaslammið hér
Skráningareyðublöð er að finna á öllum Borgarbókasöfnunum, auk þess sem hægt er að skrá sig með tölvupósti hjá Birni Unnari Valssyni, bjorn.unnar.valsson@reykjavik.is.
Frekari upplýsingar má nálgast hjá Guðríði Sigurbjörnsdóttur, gudridur.sigurbjornsdottir@reykjavik.is, og Birni Unnari Valssyni, bjorn.unnar.valsson@reykjavik.is.
