Bækurnar Hrím og Skrímslavinafélagið tilnefndar
Við óskum rithöfundunum Hildi Knútsdóttur, Tómasi Zoëga og Sólrúnu Ylfu Ingimarsdóttur innilega til hamingju með tilnefningar til barna- og unglingabókmenntaverðlauna Norðurlandaráðs 2024. Verðlaunin verða afhent í Reykjavík 22. október n.k. í tengslum við þing Norðurlandaráðs.
Í rökstuðningi dómnefndar um Hrím eftir Hildi Knútsdóttur segir m.a.:
„Lesandinn getur auðveldlega speglað sig í áhugamálum Jófríðar, eins og perlusaumuðum fatnaði úr kópaskinni eða snúnum ástamálum þar sem hún þarf að velja milli Suðra, myndarlega stráksins í Ljósavatnsskaranum, og æskuvinar síns, Bresa. Líf Jófríðar umturnast hins vegar þegar henni er gert að taka á sig þunga ábyrgð á velferð og framtíð alls skarans. Hún leggur ein af stað í leiðangur þar sem hún hefur aðeins á sjálfa sig að treysta og verður að finna sína eigin leið til að tryggja velferð fólksins síns.“
Í rökstuðningi dómnefndar um Skrímslavinafélagið eftir Tómas Zoëga og Sólrúnu Ylfu Ingimarsdóttur segir m.a.:
„Bókin tekur á vináttu, flækjunum þegar tvíeyki verður að þríeyki, því að verða útundan eða fá að vera með. Hún býður upp á spjall um ákvarðanir í daglegu lífi barna, hverjar séu afleiðingar fyrir þau sjálf og aðra og hvernig hægt sé að taka ábyrgð á gjörðum sínum. Umfjöllunarefnið er beintengt raunveruleika íslenskra barna, en vandamálin sem fjallað er um verða samt aldrei stærri en ævintýrið.“