Bókmenntagöngur

Borgarbókasafn býður upp á fjölbreyttar bókmenntagöngur. Markmiðið er fyrst og fremst að kynna íslenskar bókmenntir á lifandi hátt, en einnig að fjalla um borgina sem svið bókmennta að gömlu og nýju og sýna þátttakendum þannig umhverfi sitt í nýju ljósi. Viðfangsefni ganganna er mjög fjölbreytt og má nefna sem dæmi glæpagöngu, pöbbagöngu, ljóðagöngu og „neðanjarðargöngu“.

Leikarinn Darren Foreman les fyrir göngugesti við Landnámssýninguna á Aðalstræti

Bókmenntagöngur eða bókmenntarútuferðir fyrir hópa

Bókmenntagöngurnar eru tilvaldar fyrir hópa sem vilja brjóta upp hversdaginn og gera eitthvað skemmtilegt og njóta útveru um leið. Sérpantaðar göngur kosta kr. 40.000. Nánari upplýsingar veitir Björn Unnar Valsson, bjorn.unnar.valsson@reykjavik.is

Rafrænar bókmenntagöngur

Borgarbókasafnið og Reykjavík Bókmenntaborg hafa, í samstarfi við RÚV, unnið rafrænar bókmenntagöngur sem hafa verið aðgengilegar á appinu Reykjavík Culture Walks fyrir iOS og Android stýrikerfi. Um er að ræða göngur á íslensku, ensku og þýsku. Reykjavík Culture Walks er ekki aðgengilegt eins og stendur en unnið er að uppfærslu.

Kvöldgöngur

Í júní, júlí og ágúst á hverju ári stendur Borgarbókasafn, ásamt öðrum menningarstofnunum Reykjavíkurborgar, fyrir vikulegum kvöldgöngum í borginni. Hver ganga hefst að venju kl. 20 á fimmtudagskvöldi.

Dagskrá sumarsins er venjulega tilkynnt í byrjun maí og er þá auglýst hér á heimasíðu safnsins, en auk þess er hægt að fylgjast með á Facebook-síðunni Kvöldgöngur.

Dark Deeds in Reykjavík – A Guided Literary Walk

(Click here for English)

Í júní, júlí og ágúst býður safnið upp á vikulega bókmenntagöngu á ensku fyrir erlenda ferðamenn og aðra áhugasama um miðbæinn. Gangan er farin á fimmtudögum kl. 15. Gangan hverfist að mestu um glæpi og drungalega atburði í bókmenntum sem tengjast Reykjavík, og gefur því nokkra innsýn í íslenska krimma og draugasögur.

Undanfarin ár hefur safnið sýnt 45 mínútna heimildamynd um íslenska þjóðtrú í kamesinu – sýningarrými á 5. hæð safnsins, kl. 14 á fimmtudögum. Myndin nefnist Spirits of Iceland: Living with Elves, Trolls and Ghosts. Sýningin er hugsuð sem upphitun fyrir gönguna og hefur verið vinsæl meðal göngugesta.