Fiktaðu meira!

Í boði á Tilraunaverkstæðinu

Kennarar athugið! Þið getið skráð bekkinn ykkar í bekkjarkynningu á Tilraunaverkstæðið í Gerðubergi hér.

Almenningsbókasöfn víða um heim eru leiðandi í tilraunum um að veita opinn aðgang að nútímatækni og tækjabúnaði þar sem útbúin eru svokölluð „Makerspaces“ eða sköpunarrými þar sem gestir fá aðgang að opnu rými til að prófa sig áfram, skapa og uppgötva nýja hluti. Þannig stuðla bóksöfnin að jöfnu aðgengi barna og fullorðinna að spennandi tækni og tækifærum til að öðlast meiri hæfni.

Krakkar og fullorðnir hafa aðgang að tölvum og geta fiktað sig áfram í forritunarleikjum, notað 3D prentarann okkar eða vínylskerann.

Hér er hægt að kynnast Raspberry Pi tölvunum, taka fyrstu skref í forritun í Scratch (sem hentar yngstu börnunum vel) og læra grunnhugtök forritunar með því að forrita í Minecraft, leika með makeymakey og fleira. 

Borgarbókasafnið vill leggja sitt af mörkum til að auka aðgengi að tækniþekkingu borgarbúa á öllum aldri. Liður í því er samstarf við félagasamtökin Skema HR sem hófst sumarið 2016, þá undir nafninu Kóder, og strax um haustið byrjuðu menningarhúsin að prófa sig áfram með Tilraunaverkstæðið með leiðbeinendum frá Skema HR, sem hafa að leiðarljósi að breiða út þekkingu á forritun til sem flestra án tillits til stöðu eða efnahags. 

Samtökin Skema HR heimsækja okkur reglulega og standa fyrir fjölbreyttum námskeiðum fyrir börn og unglinga í ýmiss konar forritun. Samtökin hafa einnig haldið námskeið fyrir grunnskólakennara sem vilja auka þekkingu sína og nýta forritun í eigin starfi.Þau hafa þá hugsjón að öll börn skuli hafa greiðan aðgang að þeirri þekkingu sem forritun, tæknikunnátta og tæknilæsi felur í sér.  Borgarbókasafnið deilir þeirri hugsjón og með Tilraunaverkstæðinu er unnið að því að efla læsi fólks á stafrænum miðlum, með því að skapa vettvang og aðstöðu til að kynna nýja tækni og hugmyndir sem leiða til þekkingaröflunar. 

Tæknilæsi og forritun eru óðum að verða lykilþættir í menntun barna og fullorðinna, auk þess sem hugmyndafræði nýsköpunar nýtist á öllum sviðum. Borgarbókasafnið stefnir að því að verða skapandi samverurými sem styður þekkingaröflun á fjölbreyttan hátt. 

Við bjóðum reglulega upp á námskeið á Tilraunaverkstæðinu í Gerðubergi og höfum sömuleiðis fært búnaðinn tímabundið á milli safna til þess að geta haldið námskeið í öðrum menningarhúsum okkar. 

Rafknúnir ávextir

Í bígerð er að opna tónlistartilraunaverkstæði í Grófinni. Fylgist með!