Bókasöfn eru mikilvægur griðastaður í erli dagsins. Þangað er alltaf gott að koma – og það kostar ekkert! Á safninu geta krakkar sótt sér innblástur og tekið þátt í skapandi og lestrarhvetjandi verkefnum. 

Borgarbókasafnið býður upp á fjölbreytta og spennandi fræðslu fyrir krakka í 3. – 7. bekk:

• Viljið þið kynna ykkur alla þá möguleika sem Tilraunaverkstæðið býr yfir? Leyfa krökkunum að prófa þrívíddarprentara, læra forritun með aðstoð Minecraft eða leika með MakeyMakey? Við tökum vel á móti ykkur á Tilraunaverkstæði Borgarbókasafnsins. 
   
• Allir eiga sína sögu og menningu. Menningarmót fara ýmist fram á Borgarbókasafninu eða í skólanum, en þar segja og sýna krakkar frá sínum menningarheimum – notaleg og skemmtileg samverustund þar sem allir fá að njóta sín. 
   
• Myndasögusýningar eða Þetta vilja börnin sjá! – við bjóðum upp á leiðsagnir um ýmsar spennandi sýningar á safninu. 
   
• Kanntu á bókasafnið þitt? Við bjóðum að sjálfsögðu upp á hefðbundnar safnkynningar þar sem við kynnum bókasafnið fyrir krökkunum og sýnum þeim hvar best er að leita að spennandi bókum. 

 
Við erum líka með ýmislegt skemmtilegt í boði fyrir krakka eftir að skólatíma lýkur. Tilraunaverkstæðið stendur fyrir klúbbum, við bjóðum upp á heimanámsaðstoðina Heilahristing í samvinnu við nokkra skóla, auk þess sem við hvetjum krakka á öllum aldri til þess að nýta sér aðstöðuna á Borgarbókasafninu til þess að hitta vini sína, læra, leika sér og slappa af eftir að skóladegi lýkur. 

Fáið frekari upplýsingar og bókið fræðslu með því að senda tölvupóst á fraedsla@borgarbokasafn.is eða hringja á söfnin!

Verkefnastjóri barna- og unglingastarfs er Ingibjörg Ösp Óttarsdóttir, ingibjorg.osp.ottarsdottir@reykjavik.is.