TIlnefningar til Viðurkenningar Hagþenkis voru tilkynntar 10. febrúar
TIlnefningar til Viðurkenningar Hagþenkis voru tilkynntar 10. febrúar

Tilnefningar til Viðurkenningar Hagþenkis 2020

Tilnefningar til Viðurkenningar Hagþenkis fyrir útgáfuárið 2020 voru tilkynntar við hátíðlega athöfn í Ljósmyndasafni Reykjavíkur þann 10. febrúar. Viðurkenning Hagþenkis hefur verið veitt árlega síðan 1987, fyrir samningu fræðirita, kennslugagna, aðra miðlun fræðilegs efnis eða rannsóknir. Í ár voru fræðiritin fjölbreytt sem endranær, umfjöllunarefnin snerta meðal annars á dýrum og náttúrufyrirbrigðum, húsasmíði og pólitík, heimsfaraldri og tungumálum. Eftirtaldir höfundar eru tilnefndir fyrir verk sín að þessu sinni. Meðfylgjandi er rökstuðningur dómnefndar:

Ásdís Lovísa Grétarsdóttir og Erna Jessen: Námsefni í dönsku á grunnskólastigi.
Útgefandi: Menntamálastofnun og Námsgagnastofnun.
„Heildstætt og vandað námsefni í dönsku. Metnaðarfullt og fjölbreytt höfundarverk þar sem margra ára samstarf tveggja reynslumikilla kennara nýtur sín.“

Bergljót Soffía Kristjánsdóttir: Fræðaskjóða. Bókmenntafræði fyrir forvitna.
Útgefandi: Bókaútgáfan Sæmundur.
„Ítarleg og skemmtileg umfjöllun um bókmenntafræði. Hugtök eru skýrð á nýstárlegan hátt með mýmörgum dæmum. Mikill fengur fyrir áhugafólk um bókmenntir.“

Gísli Pálsson: Fuglinn sem gat ekki flogið.
Útefandi: Mál og menning.
„Læsileg og þörf bók þar sem hugmyndin um útrýmingu og endalok dýrategundar er skoðuð frá óvenjulegu sjónarhorni.“

Gunnar Þór Bjarnason: Spænska veikin.
Útgefandi: Mál og menning.
„Vel skrifuð bók þar sem stjórnmálum á örlagatímum er fimlega fléttað saman við sögur einstakra manna og fjölskyldna með vandaðri sagnfræði.“

Hjörleifur Hjartarson og Rán Flygenring: Hestar.
Útgefandi: Angústúra.
„Teflt er saman gömlum sögum og nýjum, skemmtilegum texta og líflegum myndum í bók sem bæði fræðir og gleður.“

Jón Hjaltason. Fæddur til að fækka tárum. Káinn. Ævi og ljóð.
Útgefandi: Völuspá útgáfa.
„Kveðskapurinn talar sínu máli í hlýlegri frásögn af ævi drykkfellda hagyrðingsins og stemningin fyrir skáldskap í daglegu lífi Vestur-Íslendinga verður næstum áþreifanleg.“

Kjartan Ólafsson. Um Kommúnistaflokkinn og Sósíalistaflokkinn. DRAUMAR OG VERULEIKI. Stjórnmál í endursýn.
Útgefandi: Mál og menning.
„Merk samantekt á sögu ysta vinstrisins í íslenskum stjórnmálum á 1930-1968 frá sjónarhóli manns sem sjálfur var í innsta hring þeirrar hreyfingar.“

Kristján Leósson og Leó Kristjánsson †: Íslenski kristallinn sem breytti heiminum.
Útgefandi: Mál og menning.
„Fróðlegt ferðalag um eðlisfræðisögu ljóssins og mikilvægt hlutverk silfurbergs frá Íslandi í henni.“

Pétur H. Ármannsson. Guðjón Samúelsson húsameistari. 
Útgefandi: Hið íslenska bókmenntafélag.
„Vandað og ítarlegt yfirlitsrit um ævi og verk Guðjóns Samúelssonar. Verðugur minnisvarði um manninn sem mótaði byggingarlist og skipulagsmál hins nýsjálfstæða Íslands.“

Sigurður Ægisson. Íslensku fuglarnir og þjóðtrúin. 
Útgefandi: Bókaútgáfan Hólar.
„Ríkulega myndskreytt og frumlegt verk um íslenska varpfugla með margvíslegum fróðleik, ljóðum og frásögnum af sambúð náttúru og manns.“

Fimmtudagur 11. febrúar 2021
Flokkur
Materials