Barnadeildin í Gerðubergi
Í Gerðubergi er falleg og rúmgóð barnadeild þar sem öll börn eru velkomin! Þetta þykir ákaflega ævintýralegur staður fyrir krakkana, en hann er hannaður í grænum lit safnsins af Ninnu Þórarinsdóttur. Hér eru alltaf tuskudýr og pappakubbar í boði fyrir yngstu börnin og Legó-kubbar og spil fyrir þau eldri.
Fyrir unglinga og börn sem hafa aldur til bendum við á Tilraunaverkstæðið okkar, en það hefur að geyma tölvur, 3D prentara og vínylskera.
Litavagninn okkar er stundum dreginn fram og þar geta krakkar fengið ýmislegt skemmtilegt til að lita og föndra með. Sömuleiðis eru bæði búningar og dótakassinn okkar í boði á sérstökum stundum.
Safnið býður bæði upp á sögustundir og safnkynningar fyrir hópa. Vikulega er boðið upp á fjölskyldustundir fyrir foreldra barna sem ekki eru komin á leikskólaaldur.
Í Gerðubergi eru einnig í boði Fjölskyldustundir, líka þekktar undir heitinu „Foreldramorgnar“, í umsjón starfsmanna Þjónustumiðstöðvarinnar og fjögurra leikskóla í Breiðholti. Þá eru nýbakaðir foreldrar einstaklega velkomnir með börn sem ekki eru komin á leikskólaaldur.
Aðstöðu til að skipta á börnunum má finna á neðri hæð Gerðubergs.
Einnig er mikið úrval af barnabókum í boði, bæði á íslensku og á erlendum tungumálum svo tvítyngd börn á öllum aldri eru einstaklega velkomin!
