BORGARBÓKASAFNIÐ

Hvenær notaðir þú bókasafnið í fyrsta sinn?
„Þegar ég flutti fyrst hingað var ég nýbúin að eignast son minn og fann fyrir dálítilli einangrun í byrjun, enda var ég mest heima að sinna barninu. Ég fór svo að taka eftir því að það væru ekki svo margir staðir í landinu sem væru sérstaklega miðaðir að börnum. Þegar ég bjó í Berlín, til dæmis, voru leikvellir alls staðar og margir staðir og viðburðir sem hentuðu fjölskyldum vel. Veðrið hér gerði hlutina líka aðeins erfiðari. Svo uppgötvaði ég bókasöfnin. Þau eru svo notaleg og taka vel á móti öllum. Þar eru alltaf sérstök svæði fyrir börn og jafnvel ókeypis kaffi, sem ég kann virkilega vel að meta – sérstaklega í landi þar sem allt er svona dýrt. Mér finnst bókasöfnin hér líka ótrúlega hugguleg. Þau eru talsvert frábrugðin þeim bókasöfnum sem ég hef kynnst í öðrum löndum, þar sem yfirleitt er ætlast til að fólk sitji hljótt og lesi bara.
Hér er miklu meira um að vera. Boðið er upp á svo margvíslega dagskrá að söfnin virka nánast eins og félagsmiðstöðvar. Þar eru líka haldnir margir menningarviðburðir, sem hafa gefið mér tækifæri til að læra eitthvað nýtt, kynnast fólki og finna fyrir meiri tengingu við samfélagið.“

Af hverju byrjaðir þú að koma í Samveru?
„Ég er núna að læra íslensku, sem er virkilega erfitt tungumál. Ég hef lært nokkur tungumál áður, en þetta hefur reynst það erfiðasta hingað til. Mig langar hins vegar mjög mikið til að ná góðum tökum á málinu, þar sem ég er kominn með fjölskyldu og við sjáum fyrir okkur að vera áfram á Íslandi til langs tíma. Barnið mitt er í leikskóla hér og er byrjað að tala íslensku, svo mig langar líka að geta stutt við það eftir því sem það eldist. Ég tel að það að tala tungumálið skipti miklu máli til að finnast maður vera hluti af samfélaginu.
Ég er einnig í íslenskunámi í háskólanum, en framfarirnar eru frekar hægar þar sem ég hef engan heima til að æfa mig með, og ég er ekki í vinnu núna þar sem ég get nýtt tungumálið. Þess vegna er Samvera frábært tækifæri til að æfa sig, sérstaklega vegna áherslunnar á náttúruna. Mér líður líka betur og er afslappaðri þegar ég tala íslensku við aðra sem eru líka að læra. Stundum finnst mér óþægilegt að tala íslensku við móðurmálshafa, svo það er auðveldara fyrir mig að æfa mig í umhverfi þar sem allir eru að læra og skilja þær áskoranir sem fylgja því að tala nýtt tungumál.
Maður fær líka hreyfingu með því að ganga og vera úti í náttúrunni. Að hafa aðgang að svona fallegri náttúru er eitt af því besta við að búa á Íslandi, og það er eitthvað sem við ættum sannarlega að nýta okkur vel. Sérstaklega yfir langan veturinn, þegar það er auðvelt að eyða miklum tíma innandyra, er mjög dýrmætt að hafa ástæðu til að fara út og njóta náttúrunnar. Þetta er enn ein ástæðan fyrir því að ég kann svo vel að meta áhersluna á náttúruna í Samveru.“
Hvaða áhrif hefur það að koma í Samveru haft á íslenskuna þína?
„Ég hef aðeins mætt þrisvar , en ég finn nú þegar að ég er orðin öruggari í að tala íslensku. Ég hóf nám í íslensku fyrir háskólanema í haust, þar sem kennslan fer alfarið fram á íslensku. Þetta var nokkur áskorun í byrjun, en það hefur hjálpað mér að komast meira í snertingu við tungumálið.
Samvera veitir mér aukinn hvata; þegar farið er í göngutúr spjallar maður bara endalaust, og það skiptir engu máli þótt maður geri villur – við erum jú öll að læra. Ég tel að þessar tvær leiðir styðji vel hver við aðra: í háskólanáminu læri ég grunninn og fæ meiri íslensku í eyrun, en hjá Samveru fæ ég tækifæri til að æfa mig í afslöppuðu andrúmslofti, án nokkurrar pressu.
Mér finnst líka gaman að uppgötva nýjar barnabækur á bókasafninu. Í hvert sinn sem ég mæti í Samveru reyni ég líka að fá lánaðar nokkrar bækur. Ég les fyrir barnið mitt á hverjum degi og reyni jafnframt að lesa fleiri íslenskar bækur, þannig að ég geti æft tungumálið á meðan við njótum þess að lesa sögur saman. Þetta gerir námið skemmtilegra og gefandi, þar sem þetta er eitthvað sem við getum notið saman sem fjölskylda.“

Á hvaða aðra vegu nýtir þú bókasafnið?
„Ásamt samstarfsfólki úr samtökunum GETA skipulegg- ég vikulega listasamkomu sem kallast „Get Together“. Hvern fimmtudagseftirmiðdag nýtum við rými á bókasafninu til að leiða fólk saman og skapa tilfinningu fyrir samkennd og samfélagi í gegnum listir og sköpun.
Frá því að verkefnið hófst höfum við tekið á móti fólki frá meira en 20 mismunandi löndum og boðið upp á fjölbreytta dagskrá í hverri viku. Þetta er alltaf mjög skemmtilegt og frábært tækifæri fyrir innflytjendafjölskyldur og íslenskar fjölskyldur til að hittast og verja tíma saman.
Margir þeirra sem taka þátt eiga ung börn. Þegar mestur tími fer í að sinna börnum getur manni stundum fundist maður einmana. Þessar samkomur veita foreldrum tækifæri til að anda aðeins, hitta annað fólk, á meðan börnin geta leikið sér og eignast vini. Þetta er svolítið eins og að vera í þorpi.
Hér koma líka reglulega fjölskyldur flóttafólks og ungt fólk sem leitar verndar. Fyrir þau eru þessar samkomur mikilvægt tækifæri til að halda tengslum við aðra, finna fyrir lífskrafti og von, upplifa gleði og leyfa sér að leika, jafnvel þótt lífið geti verið erfitt.“
Hversu mikilvægt er það að þessi samkoma fari fram á bókasafninu?
„Ég tel þetta vera mjög mikilvægt, því bókasöfn eru rými þar sem maður þarf ekki að sanna hver maður er eða réttlæta veru sína til að eiga þar heima. Þau taka á móti öllum með opnum örmum.. Fyrir fólk sem hefur flutt hingað frá öðrum löndum vaknar oft spurningin: „Er ég nógu góður/góð til að nýta mér þessa þjónustu?“
Bókasafnið er staður sem dæmir mann ekki; maður getur einfaldlega komið eins og maður er. Þetta er líka vettvangur fyrir samskipti og miðlun þekkingar, þar sem fólk getur deilt reynslu sinni og lært hvert af öðru í gegnum þá fjölbreyttu viðburði og starfsemi sem þar fer fram. Allir eru jafnir, og mér finnst það veita mikinn styrk.“

Samvera eru vikulegir viðburðir sem sameina fólk sem er að læra íslensku og fólk með íslensku sem móðurmál til að spjalla, kynnast og læra hver af öðrum. Alla föstudaga 4. september - 4. desember, kl. 11.00 til 13.00, Gerðuberg.
Get Together eru afslappaðar listastundir fyrir innflytjendafjölskyldur og öll þau sem leita tengsla og samfélags. Alla fimmtudagar, 1. oktober - 3. Desember, 14:30 - 16:30, Gerðuberg.