BORGARBÓKASAFNIÐ
Mikið var um dýrðir í Borgarleikhúsinu á laugardagskvöldið þegar Sögur: verðlaunahátíð barnanna 2026 var haldin hátíðleg í sjöunda sinn. Þar voru veitt verðlaun samkvæmt niðurstöðum krakkakosninga um land allt fyrir barnamenningarefni sem þótti best og skemmtilegast á síðastliðnu ári.
Inga Sóllilja Arnarsdóttir hlaut tvenn verðlaun, sem sjónvarpsstjarna ársins og fyrir bestu talsetninguna í hlutverki Lilo í Lilo og Stitch. Barnabókin Skólastjórinn eftir Ævar Þór Benediktsson vann einnig tvenn verðlaun á hátíðinni. Bókin var valin besta bókin og einnig best myndlýsta bókin, en það var Elín Elísabet Einarsdóttir sem myndlýsti.
Á verðlaunahátíðinni voru veitt 10 margvísleg verðlaun fyrir bestu bækur, sjónvarpsefni, leiksýningar og tónlist fyrir börn og unglinga auk heiðursverðlauna sem í ár voru veitt Stundinni okkar sem fagnar 60 ára afmæli í ár.
Síðast en ekki síst fengu börnin sjálf verðlaun fyrir eigin listsköpun en veitt voru verðlaun fyrir m.a. bestu frumsömdu lögin, smásögurnar, stuttmyndir og leikrit.
Bestu smásögurnar 2026: Emma, Ísbjörninn og fjólubláa skóflan eftir Valdísi Eir Óskarsdóttur og Nistið eftir Lovísu Hind Þorsteinsdóttur.
Bestu stuttmyndir 2026: Svartholið eftir Móeiði Ronju Davíðsdóttur, Týnda mjólkin eftir Karítas Magnúsdóttur og Gleraugun eftir Þórunni Obbu Gunnarsdóttur og Guðfinnu Kristnýju Helgadóttur.
Bestu leikritin 2026: Torgið eftir Ásgeir Atla Rúnarsson og Geimverur í heimsókn! eftir Axel Frey Garðarsson, Hilmar Birkisson, Hrein Atla Gunnarsson og Sævar Hrafn Garðarsson.
Bestu lögin: Skólavinur eftir Auði Helgu Aradóttur Einarsdóttur flutt af Klöru Elías, Náttfatapartý eftir Evu Máney Ingibergsdóttur og Söru Lovísu Gunnarsdóttur flutt af Jóhönnu Guðrúnu og Förum út í geim eftir Ómar Elí Fannarsson flutt af VÆB.
Sögur eru samstarfsverkefni 7 aðila: Borgarbókasafns, Borgarleikhúss, Reykjavíkur Bókmenntaborg UNESCO, KrakkaRÚV, Listar fyrir alla, Miðstöðvar menntunar og skólaþróunar og Skóla- og frístundasviðs Reykjavíkurborgar.
Frekari upplýsingar um verðlaunahafa í hverjum flokki fyrir sig má finna hér.
Frekari upplýsingar um Sögur má finna hér.